Prins Tum I en Prinses Suzanne

Karnevalsvereineging C.V. De Sjlaaibök maak gruutsj en mèt vol gemood bekind, tot op zaoterdag 6 jannewarie um 21.11 oor in ‘t 69ste besjtaonsjaor, ten aanzeen van ’t nao vastenaovend verlangend Volk van Amie en umsjtreke, is oetgerope en geïnstalleerd tot

Gruutsj en Hoeg Hoeglöstig Prinsepaar 2024:

Prins Tum I en Prinses Suzanne

De nuije Gruutsje en Hoege Hoeglöstigheid van C.V. de Sjlaaibök-Amie; Prins Tum d’n Iersjte en zien al eve Hoeglöstige Prinses Suzanne zien in Amie – en daoboete – bekind es Tum Pilet en Suzanne Ubachs. Zie woene in de Peppelhoven in Amie.

Ôs Prinsepaar is gebore en getoge in Amie.

Ozze Prins is de zoon van Emile en Monique Pilet en is 28 jaor geleije gebore in de aw Kloestersjtraot. Ôs Prinses is de dochter van Ajd Prinsepaar Bert Ubachs en Petra Brandts en 25 jaor geleije gebore in de Lovendaalhoeve.

Ôs Prinsepaar is beejein sinds 2018, en woent sinds kort in de Peppelhoven.  

Ozze Prins is Fysiotherapeut van beroep. In de vrije tied sjpeilt heer in de verdediging van `t iersjte elftal van RKASV, Blaos zich de longe oet `t lief beej de herremenie en beej de Böck en is daoneve vaste deilneumer van ozze zittinge, boe heer de ganse zaal aan `t lache maak. Heer zit ouch nog beej stichting SAME.

Ôs Prinses is lierkrach op de basissjaol in Amie, dus mèt de jeugconnectie zit `t dit jaor wel good. In häöre vrije tied sjpeilt zie ouch beej de herremenie.

Same mèt häöre Prins deit zie ouch geire skiën en wandele, en daonao natuurlijk lekker borrele mèt `n gleiske beer.

Zie zien gruutsj um uuch dit Karnevalsseizoen veur te maoge goon en höbbe d`r sinds de veurbereidinge al hiel väöl zin in.

Zie hope uuch op alle komende aktiviteite te maoge tege kome!!

Amie Alaaf !!